Luke 18

Amp Wiya Ti Omba Jas Ei Ndi, Tᵾpa Rᵾpᵾndangga Nitim Ei Nga Ik Ek

1Jisas ndi, ik ek ropa, kitip kᵾni wu ni kᵾⱡ kundpa, wamp mbᵾ rᵾk rᵾk atinga reing nimba, mbo inditim. Wote wamp mbᵾ, enᵾmp kuⱡi nᵾⱡᵾi nitim. 2Jisas ndi, nimba mel, “Wu Jas ti, kona peng tila murum ei, Got nga mundmong indi nandpa, wote wamp mbᵾ nga nimba numan tᵾpa mundi namᵾndpa itim. 3Amp wiya ti, kona peng ila murum. Amp ei, rᵾk rᵾk wu jas ei, murum kona nila omba, wu jas ei, kundpa nimba mel, ‘Na nga el puⱡa wu ei, na etpa kit mondᵾmba enim. Nim ndi, na tᵾkᵾn rᵾpᵾndᵾn nᵾmp ont,’” nitim. 4Unt, wu jas ei ndi, amp ei, tᵾp rᵾpᵾndi nᵾpᵾndimp nimba pitim. Wote akᵾk tᵾpa, wu jas ei, pitim mel, “Na Got kᵾn mundmong iti natᵾnt ku, wamp mbᵾ nga numan tᵾp mundi namᵾndᵾnt ku ei ka! 5Wote amp ei, (wam wu ei kurum,) rᵾk rᵾk na mbun ngumba pᵾnt ei, kuimp tep tᵾp rᵾpᵾndamp. Wote rᵾk rᵾk, na munt ila mint wangga kᵾn, elim nga ik ei, na pilip enᵾmp kuⱡimp,” nitim. 6Wu Nuim ei ndi, nimba mel, “Enim wu jas kit ei, na ik ei, kum tek pilᵾi! 7Akup, Got nga wamp mak ropa, elim titim kᵾⱡ, rumbuldi rᵾngmᵾ raⱡ, Got elim kᵾn, ka eng ndam, Got ndi, wamp mbᵾ, tᵾpa rᵾpᵾndi napᵾndᵾmba ye! Wote Got ndi, wengᵾndupa wamp mbᵾ, tᵾpa rapᵾndᵾmba ei? Ei mon! 8Na ndi, enim kundᵾp nᵾnt. Got ndi, enim tᵾkrᵾpa mint tᵾpa rapᵾndᵾmba. Wote Muⱡᵾl Wu Kupa om ei kanᵾmba, mᵾi kona ila wamp mbᵾ, mondᵾk pilik mormin, muna mon nda, uⱡ ei kanᵾmba?” nitim.

Ku Takis Titim Wu Ti Kᵾn, Perisi Wu Ti Kᵾn, Wu Raⱡ Nga Ik Ek

9Wamp mat ndi, en enim wamp kun kai mbᵾ nᵾk kᵾn, wamp mat kit nᵾk pᵾtmᵾn. Uⱡ ei nga Jisas ndi, ik ek kat ropa, wamp mbᵾ nimba mel, “Wu raⱡ manga wingti ila atinga ruinggil, pilkᵾⱡ purᵾnggil. Wu ti, ku moni takis titim. Wu ti, Perisi wu ei kᵾn purᵾnggil. 11Perisi wu ni, manga wingti ila mukᵾr omba anggilpa, numan ila atinga ropa, nimba mel, ‘Na wu mat kᵾn kapⱡa mon. Uⱡ ei nga, Got nim kᵾn angge nᵾnt. Wu mat kindᵾp nok, uⱡ kit mbᵾ etᵾk, wapra rok etmin. Na uⱡ mbᵾ, iti natᵾt. Ku takis tᵾtᵾm wu ei mel, na mon. 12Kor ou mbila pora, ant raⱡ to rop pendᵾp kᵾn, rᵾng mowi mor. Na ndi, mel mbᵾ kandᵾp tᵾp kᵾn, rᵾk ila kᵾmp tᵾp 10 mel, Got nim ngur,’ nitim. 13Wote, ku takis tᵾtᵾm wu ni, manga wingti ila mukᵾr omba, ruⱡ etpa anggilpa, mᵾi kandpa moⱡpa, pepil ombil ila ⱡurwa ropa nimba mel, ‘Got ye! Na uⱡ kit mbᵾ nga puⱡ wu ei ka! Nim ndi, na kont kuⱡi!’ nitim. 14Wote Jisas ndi, wamp mbᵾ, kundpa nimba mel, “Ku takis titim wu ei, atinga ropa pora ndupa, mang kona purum ei, Got nga kuimp keta ila wu kun ei murum. Perisi wu nga mbi kit murum. Uⱡ ei nambuⱡ emel, wamp mat ndi, en enim nga mbi paka rondung ndam, wamp mbᵾ Got ndi, ropa mana ndumba. Wamp mat ndi, en enim nga kᵾng orunga, mana nduk moⱡᵾng ndam, wamp ei nga mbi Got ndi, paka rondᵾmba,” nitim.

Jisas Ndi, Kangambuⱡa Kel Mbᵾ Memp Pinditim

15Wamp mat ndi, en enim nga kangambuⱡa nana mbᵾ mek, Jisas murum kona nila orung. Wote kangambuⱡa mbᵾ, Jisas ndi, ki oⱡa ndupa, peng mbila ambᵾⱡangga, nᵾk pilik mek orung. Wote, kitip kᵾni wu kᵾⱡ ndi, wamp mbᵾ uⱡ i etᵾk orung, ni kandᵾk, wamp mbᵾ, ik mura ngurung. 16Wote Jisas ndi, kangambuⱡa mbᵾ wi ropa, elim mor ila nondpa, wᵾi nimba kᵾn, elim nga kitip kᵾni wu kᵾⱡ, kundpa nimba mel, “Enim ndi, kangambuⱡa mbᵾ, wak rangina, ya na mor ila weing, imp muⱡi nᵾmbᵾⱡᵾi! Got nga wamp tᵾpa mumuk rui uⱡ ei, ya kangambuⱡa kel mbᵾ mel, numan pilᵾng uⱡ ei kapⱡa,” nitim. 17Wote Jisas ndi, nimba mel, “Na ik kupa kat enim kundᵾp nᵾnt an. Wamp nam ti ndi, Got nga wamp tᵾpa mumuk rui uⱡ ei, kangambuⱡa kel mel ralk molk, ti natᵾng ndam, wamp ei, Got nga wamp tᵾpa mumuk rui kona ila, rukᵾr kapⱡa pi napᵾmba, mon!” nitim.

Wu Mel Pi Murum

18Wote, Jura wu mel pi ti ndi, Jisas waldpa, nimba mel, “Ik mbo wu kai ye! Na ndi, nambuⱡ etᵾp moⱡᵾp, uⱡ nga kᵾnt nga kont mba mul uⱡ ei, kandᵾp timp nda?” nitim. 19Jisas ndi, wu mel pi ni, kundpa nimba mel, “Nambuⱡ emel, na wu kai nᵾn? Got tenda ei mint, kai morum. 20Nim Moses nga mi ik kᵾⱡ, pilkᵾn pora ndurun ni ka! Wu ti nga amp ei kᵾn, wapra rui uⱡ ei mon. Wamp ti rok kundi uⱡ ei mon. Kindᵾp nui uⱡ ei mon. Ik kol rui uⱡ ei mon. Tipanᵾm manᵾm raⱡ tᵾkᵾn, ou ndukᵾn, ik nᵾnggil ei, pilkᵾn pep rokᵾn iti!” nitim. 21Wote, wu mel pi ni ndi, nimba mel, “Na kel kᵾn moⱡᵾp ur ui ei, on akup ya mor ei kᵾn, mi ik mbᵾ pora, na pep rop ket,” nitim. 22Wu mel pi ni nga ik nitim kᵾⱡ, Jisas pilpa kᵾn, wu mel pi ni, kundpa nimba mel, “Nim mel tenda ti nga mon ndurum ei ka! Nim nga mel tekᵾn morᵾn mbᵾ, wamp mat kᵾn, mel rarᵾp rokᵾn, ku moni yant tin mbᵾ ndi, wamp kurpa mbᵾ, kᵾmp tᵾkᵾn ngui! Nim uⱡ i in ei ndi, wi muⱡ kona ila, nim wu nuim muⱡin. Uⱡ i etkᵾn kᵾni, wote nim ndi, na punt mel kandkᵾn, pep rokᵾn ui!” nitim. 23Jisas nga nitim ik kᵾⱡ, wu mel pi ni pilpa, numan orunga mbun titim. Uⱡ ei, nambuⱡ emel, wu ei kng mel ou ndupa tepa murum ei nga pitim.

24Jisas ndi, wu mel pi ni, mbun titim uⱡ ni, kandpa kᵾn, nimba mel, “Wamp nam ti, mel puⱡi tepa moⱡum ndam, Got nga wamp tᵾpa mumuk rui uⱡ ila rukᵾr mba, uⱡ ei nga mbun etpa tetᵾm. 25Kng kamel ei, gal ruri nombuⱡa ila rukᵾr mba, uⱡ ei kapⱡa mba. Wamp tᵾpa mumuk rui uⱡ ila kng mel mbᵾ, tepa moⱡum wamp ei, mindil nomba rukᵾr mba.” nitim. 26Jisas ndi, ik nitim kᵾⱡ, wamp mbᵾ ndi pilik molk, nᵾk mel. “Wote, ei mel ndam, Got ndi, wamp nam mel ti, etpa tᵾmba nda?” nᵾtᵾng. 27Wote Jisas ndi, nimba mel, “Wamp ndi, iti nᵾtᵾng uⱡ mbᵾ, Got ndi, kapⱡa etmba,” nitim.

28Wote Pita ndi, Jisas kundpa, nimba mel, “Tᵾn nga mᵾi mang kona na, mel na mbᵾ wak ropᵾn, nim pep rop ᵾmᵾn ei, tᵾn namba mel ei timin nda?” nitim. 29Jisas ndi, kitip kᵾni wu kᵾⱡ kundpa, nimba mel, “Na ndi, enim ik kupa ti, kundᵾp nᵾnt, wamp mat ndi, Got nga wamp tᵾpa mumuk rui uⱡ ei nga pilik kᵾn, en enim nga amp kangambuⱡa na, mang kona mel mbᵾ kᵾn, tipamᵾl mamᵾl wamp na, ᵾngᵾnᵾl kimᵾnᵾl mbᵾ pora, wak rong ndam, Got ndi, wamp kᵾⱡ, ya mormin ui ei kᵾn, mel ou ndupa ngumba. Unt mᵾi kona ila molk, kng mel kandᵾk tᵾtmᵾn mbᵾ, mel mon. Wote, ui mam ei kᵾn, wamp rᵾk rᵾk kont mba mul uⱡ ei ngumba,” nitim.

Jisas Elim Koⱡmba Ei Nga Nimba Raldika Inditim

31Wote Jisas ndi, elim nga kitip kᵾni wu 12 ni kᵾⱡ, tᵾpa mepa puⱡnga, kona waka tila moⱡina kᵾn, wu kᵾⱡ kundpa, nimba mel, “Enim pilᵾi! Akup tᵾn Jerusalem kona peng ou ila mbin. Ila painui wu mbᵾ ndi, unt ik pai nok nᵾk, rok pendᵾtᵾng ik ni kᵾⱡ, akup Muⱡᵾl Wu Kupa ei kᵾn, omba kupa etmba. 32Muⱡᵾl Wu Kupa ei, wu mat ndi, mek puk, mbo wu rᵾⱡaip kat ngangina kᵾn, wu mbᵾ ndi, Muⱡᵾl Wu Kupa ei, ik raka rondᵾk, nᵾk kit mondᵾk, kuimp kulwa ila ol rok, kan puⱡa rok, rok kunding. Wote, rumbᵾⱡ raldika omba pangga kᵾn, ⱡoporpa, wote kont moⱡmba,” nitim. 34Wote, kitip kᵾni wu ni kᵾⱡ, Jisas ik nitim ei nga puⱡ ti, ama pilik kun iti natᵾtᵾng. Ei nambuⱡ emel, wu ni kᵾⱡ nga numan orunga, piral ni nᵾndᵾtᵾm.

Jisas Ndi, Mong Ti Wu Ti Etpa Kai Mundrum.

35Jisas ni omba, Jeriko kona peng kel nila nondpa oⱡnga, nombuⱡa mam ᵾldᵾ ila mong ti, wu ti murum ei ndi, wamp ok purung mbᵾ kᵾn, mel mat mawa etpa murum. 36Wamp mam ti, orung ila kum tepa pilpa moⱡpa, wamp mbᵾ, waldpa nimba mel, “Wamp mbᵾ ye! Namba uⱡ ti enim nda?” nitim. 37Wamp mbᵾ ndi, mong ti wu ni, kundᵾk nᵾk mel, “Nasaret kona ila wu Jisas ni onum,” nᵾtᵾng. 38Ni kᵾn, mong ti wu ni ndi, ronduⱡ ke nimba, wi ropa, nimba mel, “Jisas, Nim Depit nga kangᵾm ye! Na kont kun ka!” nitim. 39Wamp kuimp tek nombuⱡa mam ila orung nimbᵾ ndi, mong ti wu ni, ik mura ngᵾk, raka nimba muⱡangga!” nᵾtᵾng. Wote, mong ti wu ni, pilpa kelpa, ke ronduⱡ wi ropa nimba mel, “Nim Wu Depit nga kangᵾm ye! Nim na kont kun ka!” nitim. 40Wote, Jisas omba anggilpa, wamp mbᵾ kundpa, mong ti wu ei, ki ambulk mek, elim mor ila wᵾi nitim. Wote, mong ti wu ni, mek nondpa oⱡina, Jisas ndi, wu ni, waldpa nimba mel, ”Na ndi, nim namba uⱡ ti indeimp nᵾkᵾn nᵾn ei?” nitim. Wote mong ti wu ni ndi, Jisas kundpa, nimba mel, “Wu Nuim ye! Na nga mong ei, piral nangga, wamp kᵾnimp pilip nᵾnt ei ka!” nitim. 42Wote Jisas ndi, mong ti wu ni, kundpa nimba mel, “Ei kani! Nim nga mondpa pili uⱡ ei ndi, ninim nga mong raⱡ, etpa piral ndonum!” nitim. 43Ni kᵾn, tᵾngᵾnda mint, wu ni nga mong ni, piral nilinga, wamp kᵾndrᵾm. Wote ei kᵾn, Got nga mbi paka rondpa, Jisas purum ila akil titim. Wamp minal morung nimbᵾ ndi, uⱡ ei kandᵾk, Got nga mbi ei, paka rondrung ku.